डडेल्धुरा । निर्वाचनलाई आफ्नाे पक्षमा पार्न सत्ता गठबन्धन दल नेपाली कांग्रेस र माओवादीले संयुक्त रूपमा डडेल्धुरामा निर्वाचन परिचालन मूल समिति गठन गरेका छन्। मंगलबार बसेको वाम लोकतान्त्रिक गठबन्धनका साझेदार दलहरूको बैठकले ९ सदस्यीय जिल्ला निर्वाचन परिचालन मूल समिति गठन गरेको हो।
नेपाली कांग्रेस डडेल्धुरा सभापति भीमबहादुर साउद संयोजक र माओवादी केन्द्रका जिल्ला इन्चार्ज जगतबहादुर पार्की सह–संयोजक तोकिएको माओवादी नेतृ मन्ज बमले जानकारी दिइन्। यसैगरी प्रदेशसभा (क) को निर्वाचन क्षेत्र परिचालन समितिको संयोजकमा माओवादी केन्द्रका केन्द्रीय सदस्य भरत धानुक पुकारलाई चयन गरिएको छ। उनको संयोजकत्वमा १२ सदस्यीय समिति गठन गरिएको छ। सह–संयोजकमा नेपाली कांग्रेसका क्षेत्रीय सभापति कैलाशकुमार पाण्डेय रहेका छन्।
यसैगरी प्रदेशसभा (ख) मा नेपाली कांग्रेस महाधिवेशन प्रतिनिधि तारक बुढाऐरको संयोजकत्वमा १२ सदस्यीय समिति गठन गरिएको छ। सह–संयोजकमा माओवादी केन्द्रका प्रदेश सदस्य गणेश सार्की रहेका छन्। नेकपा एकीकृत समाजवादी डडेल्धुरा भने सत्ता गठबन्धनमा बैठकमा सहभागी भएको छैन। डडेल्धुरा प्रदेशसभा (ख) मा उम्मेदवारको दाबी गरेको समाजवादीले आफ्नो पार्टीले टिकट नपाएपछि गठबन्धनबाट बाहिरिएको छ। एकीकृत समाजवादीसँग पनि वार्ता चलिरहेको नेपाली काँग्रेसका सचिव शेरबहादुर भण्डारीले जानकारी दिए।