धनगढी। नेकपा माओवादी केन्द्रका उपमहासचिव तथा सुदूरपश्चिम इन्चार्ज गिरिराजमणि पोख्रेलले श्रमिक दिवसलाई एकता र संघर्षको रुपमा अगाडि बढाउर्ने बताएका छन् । बुधबार १३५ औँ मजदुर दिवसको अवसरमा अखिल नेपाल ट्रेड युनियन महासंघ सुदूरपश्चिम प्रदेश समितिले धनगढीमा आयोजना गरेको शुभकामना आदानप्रदान तथा अन्तक्रिया कार्यक्रममा बोल्दै उनले यस्तो बताएका हुन् ।
मजदुरको पक्षमा बनाइएका कानुनहरु सही हिसाबले कार्यान्वयन नभएकाले खुशियाली मनाउनु पर्ने दिनमा पनि हामीले संघर्ष गर्नु परेको भन्दै ‘यहाँ मजदुर विरोधीलाई क्रियाशील बनाइएको छ । तर, मजदुर पक्षमा भएका कुराहरुलाई चाहीँ कमजोर बनाइएको छ ।’
अनौपचारिक क्षेत्रका श्रमिकलाई संगठित गर्ने काम अझै व्यवहारिक रुपले अघि बढ्न नसकेको बताउँदै उनले औधागिक नीति ठीक ढंगले कार्यान्वयन हुन नसकेको बताए । ‘कारखानामा काम गर्ने राम्रो वातावरण नभएर श्रमिक कारखाना भित्र ६ महिना पनि टिक्न सक्दैनन्’,उनले भने ।
त्यस्तै उनले मजदुर विकसित हुन समयअनुसारको प्रविधिको जानकार हुनुपर्ने बताए । उनले भने ‘श्रमिकले मेसिन चलाउन जान्नै पर्ने हुन्छ । जानेन भने उसले रोजगारी पाउन सक्दैन । मेसिन चलाउन जान्ने भएकाले मजदुर बैज्ञानिक चेतयुक्त हुन्छन् ।’
श्रमिक दिवस सबैले आ-आफ्नो देशको विशिष्टता र राष्ट्रिय परिवेशमा मनाउने गरेको बताउँदै भने ‘हामीले संविधानले निर्दिष्ट गरेका मौलिक हकहरुलाई कार्यान्वयन गर्नका लागि श्रमिक दिवसको सदुपयोग गर्नुपर्ने छ ।’
अखिल नेपाल ट्रेड युनियन महासंघ सुदूरपश्चिम प्रदेश अध्यक्ष भरत न्यौपानेको अध्यक्षतामा भएको कार्यक्रममा माओवादी निकटस्त मजदूर नेतासंगै सांसद, पार्टी नेता कार्यकर्ता सहभागी थिए ।