धनगढी । कैलालीको धनगढीमा वैशाख १५ देखि फस्ट लालसलाम कप–२०८१ प्रतियोगिता हुने भएको छ । अखिल (क्रान्तिकारी) कैलाली जिल्ला समितिको आयोजनामा क्याम्पस स्तरीय पुरुष भलिवल हुन लागेको हो।
आयोजकले बुधबार धनगढीमा पत्रकार सम्मेलन गर्दै आगामी प्रतियोगितामा प्रदेशभरीका ३० टिमको सहभागिता रहने जानकारी दिएको छ ।अनेरास्ववियु(क्रान्तिकारी) कैलालीका अध्यक्ष शिवराज सञ्ज्यालले प्रतियोगितामा प्रथम टिमलाई रु. १ लाख २५ हजार, द्धितीयलाई ८१ हजार र तृतीयलाई ५१ हजार एवं ट्रफि, मेडल र प्रमाणपत्र प्रदान गरिने बताए।
खेल भलिवल संघको नियम अनुसार खेलाइने, टिम दर्ता गर्दा खेलाडीको नाम अनिवार्य दिनुपर्ने, ९ जना खेलाडीलगायत १ जना प्रशिक्षक र एक जना व्यवस्थापक गरि ११ जना हुनुपर्ने तथा खेलाडी सम्बन्धित क्याम्पसमा अध्ययनरत रहेको प्रमाण पत्र पेश गर्नुपर्ने आयोजकले जनाएको छ ।
टिम दर्ता समय आगामी बैशाख १ गतेदेखि १४ गतेसम्म रहने तथा दर्ता शुल्क रु.७ हजार रहेको आयोजकले जनाएको छ । प्रतियोगिता आगामी बैशाख २२ गतेसम्म धनगढी रंगशालामा हुने जनाइएको छ। प्रतियोगिता संचालनमा कुनै निकायको सहयोग नरहेकाले प्रायोजक खोजिने अध्यक्ष सञ्ज्यालले बताए।