धनगढी । नेपाल कम्युनिष्ट पार्टी (नेकपा) सुदूरपश्चिम प्रदेश कमिटीले माघ १७ गते विशाल जनप्रदर्शन गर्ने भएको छ । प्रधानमन्त्री केपी शर्मा ओलीले गरेको प्रतिगामी कदमविरुद्ध विशाल जनप्रदर्शनको आयोजना गरिएको प्रदेश सहइञ्चार्ज तथा प्रचारप्रसार समितिका संयाेजक खगराज भट्टले बताए ।
प्रतिनिधि सभा विघटनविरुद्ध माघ १७ गते धनगढीको खुल्ला मञ्चमा ५० हजार बढी नेता, कार्यकर्ता र सर्वसाधारणको उपस्थिति गराइने भन्दै नेता भट्टले आमसभालाई पार्टीका केन्द्रीय अध्यक्षद्वय पुष्पकमल दाहल ‘प्रचण्ड’, माधवकुमार नेपाल, स्थायी कमिटी सदस्य डा. भीम रावललगायतका नेताहरुले सम्बोधन गर्ने जानकारी दिए ।
विशाल जनसभामा सुदूरपश्चिम प्रदेशका नौ वटै जिल्लाका नेता कार्यकता तथा शुभचिन्तकहरु सहभागी हुने आयोजकले जनाएको छ ।पार्टीका विभिन्न जनवर्गीय संगठनहरु परिचालन गरिएका छन् । बिराेध प्रदर्शन र्याली धनगढी चौराहा र क्याम्पस रोडबाट निकालिने छ । ¥याली दिउँसो १ बजे खुल्ला मञ्चमा सभामा परिणत हुनेछ ।
प्रर्दशनको तयारीका लागि प्रदेश इञ्चार्ज समेत रहेका नेता डा. रावल, सह इञ्चार्ज खगराज भट्ट, भानुभक्त जोशी लगायतका नेताहरु धनगढी केन्द्रीत भएका छन् । जनप्रदर्शन तथा जनसभा भव्यरुपमा सफल पार्न प्रचारप्रसार, स्वयम्सेवक, मञ्च व्यवस्थापन, जनपरिचालन लगायतका थुप्रै उपसमितिहरु गठन भएको नेकपाका प्रदेश सदस्य शिव सिं ओलीले जानकारी दिए ।