धनगढी । पूर्वपश्चिम लोकमार्गअन्तर्गत सर्लाही हरिवनमा भएको वस दुर्घटनामा दुई जनाको मृत्यु भएको छ भने १९ जना घाइते भएका छन्। आज विहान पूर्वपश्चिम राजमार्गअन्तर्गत हरिवन नगरपालिका-४ स्थित सशस्त्र प्रहरी बेस क्याम्प नजिकै ना ५ ख ४४८८ नम्बरको यात्रुबस दुर्घटना हुँदा घटनास्थलमै एक जनाको र उपचारका लागि वीरगञ्ज लैजाँदै गर्दा बाटोमा एक जनाको ज्यान गएको जिल्ला प्रहरी कार्यालय सर्लाहीले जानकारी दिएकाे छ ।
दाङबाट काँकडभिट्टातर्फ हिँडेको उक्त यात्रुबस आफैँ अनियन्त्रित भई रोडदेखि १० मिटर तल पल्टिँदा बसमा सवार ३० जनामध्ये दुईको मृत्यु भएको प्रहरी उपरीक्षक सन्तोषसिंह राठौरले जानकारी दिए।
चालकसहित पाँच जनाको अवस्था गम्भीर रहेका कारण उनीहरूलाई न्युरो अस्पताल वीरगञ्ज उपचारका लागि पठाइएको छ। अरु तीन जनाको नमूना अस्पताल हरिवनमा उपचार भइरहेको छ। नौ जनाको अवस्था सामान्य रहेका कारण स्वाभिमान अस्पताल हरिवनमा उपचार भइरहेको प्रहरीले जनाएको छ।