काठमाडौँ । सरकारले स्थलमार्ग (नाका)बाट सिमाना ओहोरोदोहोरो गर्ने यात्रुका लागि भन्सार छुटको सुविधामा केहि लचकता अपनाएको छ । राजपत्रमा नयाँ व्यवस्था प्रकाशित गर्दै सरकारले स्थल नाकाबाट आउने यात्रुलाई एक सयसम्मको भन्सार छुटबाट ५ सय रुपैयाँसम्मको व्यवस्था गरेको हो ।
‘५ सय रुपैयाँ मूल्य बराबरको सामान ल्याएमा वा लगेमा भन्सार प्रमुखले औचित्य हेरी महसुल नलिई छाड्न सक्ने अधिकार दिइएको छ । तर, त्योभन्दा बढी मूल्यका सामान वा व्यापारिक प्रयोजनका सामग्री ल्याएमा कानुन बमोजिम भन्सार तिर्नुपर्नेछ,’ राजपत्रमा भनिएको छ । बालेन नेतृत्वको सरकार आएपछि स्थल भन्सारमा कडाइ हुँदै आएको थियो । जसकाकारण भारतीय बजारबाट किनमेल गर्ने सिमाक्षेत्रका बासिन्दाहरूले विरोध गर्दै आएका थिए ।
स्थलमार्गको कडाइका बीच भारतमा अध्ययन गर्ने नेपाली विद्यार्थीहरूलाई केहि छुट दिइएको छ । उनीहरूले आफ्नो साथमा लगेको वा ल्याएको ट्याबलेट, ल्यापटप वा कम्प्युटरमध्ये कुनै एक थानमा भन्सार महसुल तिर्नु पर्ने छैन । हवाई मार्गबाट फर्कनेले एक थान ल्यापटप, एक थान घडी, क्यामरा र व्यक्तिगत प्रयोगका लुगाफाटामा पूर्ण छुट पाउनेछन् । ५० ग्रामसम्मको सुनको गहना र ५०० ग्रामसम्मको चाँदीको गहनामा भन्सार लाग्ने छैन । एक लिटरसम्मको एक बोतल मदिरा मात्र ल्याउन पाइनेछ ।
बिरामीले ल्याउने औषधि र शारीरिक रूपमा अशक्त व्यक्तिले प्रयोग गर्ने सहायता सामग्री (ह्विलचियर आदि)मा पूर्ण छुट दिइएको छ । अर्थ मन्त्रालयका अनुसार यो व्यवस्था २०८३ साल जेठ १५ गतेदेखि नै लागू भइसकेको छ ।