काठमाडौं । निर्वाचन आयोगले प्रतिनिधि सभा र प्रदेश सभाको उप–निर्वाचन आगामी २०८१ बैशाख १५ गते गर्ने निर्णय गरेको छ । आयोगको आइतबार बसेको बैठकले सरकारसँगको परामर्शमा इलाममा खाली रहेको प्रतिनिधि सभा सदस्य र बझाङ्गमा प्रदेश सभा सदस्यको उप-निर्वाचन आगामी बैशाख १५ गते गर्ने निर्णय गरेको हो ।
इलाम प्रतिनिधि सभा सदस्य निर्वाचन क्षेत्र नं. २ तथा बझाङ जिल्ला प्रदेश सभा निर्वाचन क्षेत्र नं. १ मा मिति बैशाख १५ गते शनिबारका दिन उपनिर्वाचन गर्ने गरी मिति तोक्ने निर्णय भएको आयोगका उपसचिवसमेत रहेका सहायक प्रवक्ता डा. थानेश्वर भुसालले जानकारी दिए । इलाम जिल्ला प्रतिनिधि सभा निर्वाचन क्षेत्र नं. २ बाट निर्वाचित प्रतिनिधि सभा सदस्य सुवासचन्द्र नेम्वाङ्ग र बझाङ जिल्ला प्रदेश सभा निर्वाचन क्षेत्र नं. १ बाट निर्वाचित प्रदेश सभा सदस्य पृथ्वीबहादुर सिंहको निधन भएपछि रिक्त भएको थियो ।
यसरी कुनै सदस्यको स्थान, प्रतिनिधि सभा वा प्रदेश सभाको कार्यकाल ६ महिनाभन्दा बढी अवधि बाँकी रहदै रिक्त भएमा त्यस्तो स्थान जुन निर्वाचन प्रणालीबाट पूर्ति भएको थियो, त्यसै प्रक्रियाबाट पूर्ति गरिनेछ भन्ने संवैधानिक व्यवस्था भए बमोजिम उपनिर्वाचनको मिति तोकिएको हो।