कर्णाली प्रदेशका मुख्यमन्त्री महेन्द्र बहादुर शाहीले जनयुद्धका कारण प्राप्त राजनैतिक उपलब्धीहरुको उपभोग गर्ने तर जनयुद्धलाई अस्वीकार गर्ने र यसको महानतालाई खिसिट्यूरी गर्ने प्रवृत्तिप्रति सचेत रहन आवश्यक रहेको बताएका छन् ।
शनिबार २६ औं जनयुद्ध दिवशको अवसरमा विज्ञप्ति मार्फत शुभकामना व्यक्त गर्दै मुख्यमन्त्री शाहीले ठुलो बलिदानीपूर्ण संघर्षवाट प्राप्त राजनैतिक उपलब्धिहरुलाई खोस्ने र मुलुकलाई फेरि पनि प्रतिगमनतर्फ लैजाने कुचेष्टा पनि भइरहेको भन्दै जनयुद्ध दिवसको अवसरमा सबैखाले प्रतिगमनकारी, निरंकुश र असंवैधानिक दुश्प्रयत्नहरुका विरुद्ध खबरदारी गर्दै समाजवादी व्यवस्था निर्माणको बाटोमा दृढतापुर्वक अघि बढ्न अपिल गरेका छन् ।
तत्कालीन जनयुद्धकले गाउँगाउँसम्म नेपाली जनतालाई जागृत गर्दै सामन्तवादका विरुद्धको राजनैतिक लहर ल्याएको उनको भनाइ छ । जनयुद्धकै जगमा भएको ०६२/६३ को जनआन्दोलनले नेपालमा सदियौं देखिको सामन्ती राजतन्त्रको अन्त्य र संघीय लोकतान्त्रिक गणतन्त्रको स्थापना भएको भन्दै मुलुकमा भएको यो राजनैतिक परिवर्तनले आज हामीले समावेशीता, समानुपातिकता, धर्मनिरपेक्षता, संघीयतालगायतका महत्वपूर्ण राजनैतिक उपलब्धीहरु प्राप्त गरेको बताए ।
उनले जनयुद्धमा ज्यान गुमाउनेहरु प्रति श्रद्धाञ्जली व्यक्त गरेका छन् । ‘महान् जनयुद्ध र जनआन्दोलन एवं विभिन्न न्यायपूर्ण संघर्षका क्रममा आफनो जीवन आहुती दिने महान् सहिदहरुप्रति यस ऐतिहासिक अवसरमा भावपूर्ण श्रद्धाञ्जली अर्पण गर्दछु । बेपत्ता, घाइते तथा अपांगता भएका योद्धाहरुप्रति उच्च सम्मान व्यक्त गर्दछु । साथै ऐतिहासिक जनयुद्धको पहलकदमी लिने, सुरुवात गर्ने र सहभागी सबै नेतृत्व, कार्यकर्ता, लडाकु योद्धा एवं आम जनसमुदायप्रति हार्दिक आभार प्रकट गर्दछु । ’
उनले भनेका छन् ‘निरंकुश जहाँनिया सामन्ती राजतन्त्रको अन्त्य गरी गणतन्त्रको स्थापना गर्ने उद्देश्यका साथ नेपाली जनताले सुरु गरेको सशस्त्र संघर्षको ऐतिहासिक दिन आज फागुन १ गते स्मरण गर्दै यस २६औं महान् जनयुद्ध दिवसको गौरवमय अवसरमा कर्णाली प्रदेशवासी एवं सम्पूर्ण नेपाली दाजुभाई दिदीबहिनीहरुमा हार्दिक शुभकामना व्यक्त गर्दछु ।’ नयाँपत्रिका