धनगढी । स्थानीय तहको निर्वाचन यता कैलाली जिल्लामा करिव साढे ११ हजार नयाँ मतदाता थपिएका छन्। जिल्लामा एक मतदान स्थल थप गरिएको छ भने तीन मतदानस्थल सारिएका छन्।
प्रदेश निर्वाचन आयोगका निमित्त प्रमुख प्रेम भट्टले कैलालीमा ११ हजार चार सय ३० नयाँ मतदाता थपिएकाे बताए । अब मंसिर ४ गते हुने निर्वाचनको तयारीमा आयोग रहेको बताउदै उनले भने ‘निर्वाचन आयोग कार्यतालिका बनाएर मंसिर ४ को निर्वाचतको तयारीमा जुटेको छ ।’ आवश्यक सामग्रीको आँकलन, व्यवस्थापन तथा पुराना सामग्रीको तथ्यांक अध्यावधिकको काम गर्न थालेको भनाइ छ।
कैलालीमा पाँच वटा निर्वाचन क्षेत्र छन्। मंसिर ४ गते पाँच प्रतिनिधि सभा सदस्य र १० प्रदेश सभा सदस्यका लागि निर्वाचन हुनेछ । एक मतदान स्थल थपिएपछि कैलालीमा २ सय ३७ मतदान स्थल हुनेछन्। जिल्लामा ३० राजनीतिक दल दर्ता रहेकाले उनीहरुका उम्मेदवारहरु हुनेछन्। तर सत्तारुद दलले गठबन्धन गरेकाले उम्मेदवारको संख्या कम हुने देखिएको आंकलन गरिएको छ।
